Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Más sofitos pa los que más ayuden

Votos

(Total de votos recibidos 252)

(Puntuación 2,96)

- Marejada1.jpeg
Servicios Sociales empobina más de 600.000 euros pal sofitu d'organizaciones humanitaries.
La presidenta de la Fundación Municipal de Servicios Sociales, y conceyala del área, Dª Esperanza Fernández, robló na sede de la institución once convenios coles seis organizaciones que vienen darréu, y que se dediquen al trabayu con persones en riesgu d'esclusión social: ▄ Cáritas ▄ Proyeutu Home ▄ Cocina Económica ▄ Albergue Cuadonga ▄ Fundación Siloé ▄ Congregación de les Adoratrices El presupuestu total de los convenios ye de 640.440 euros y con él sofitaránse programes empobinaos a toxicómanos, xente ensin techu, prostitutes o enfermos de SIDA, ente otros. L'Ayuntamientu poco podría facer si non contara col potencial humanu d'estes organizaciones, que faen un trabayu pocoñín a pocoñín, día a día, qu'en munches ocasiones nin se ve nin se conoz. El presidente de CARITAS n'Asturies, D.Dolfu Rivas, anunció que la so institución quier metese más nes empreses d'inxertamientu porque, la xente qu'algamó yá'l fin tien de ver la esperanza de la recuperación nel retornu. Tamién señaló que pondrá tol so enfotu en facer análisis d'estudiu pa ser una voz crítica. Amás d'esto, les perres del conveniu dirán empobinaes a les estayes que se conseñen darréu: ▄ La Oficina d'Atención al Transeúnte ▄ Los Talleres pa Muyeres ▄ Los Pisos d'Acoyimientu ▄ El Trabayu con Alcohólicos Al empar, Rivas fizo allabancia del trabayu que faen toles organizaciones, tamién la qu'él preside, nel campu la esclusión social. Pel so llau, el responsable del Albergue Cuadonga, D. Llorenzu Mariña, conseñó que'l perfil de los que van a esta institución ye yá de xente mayor, na so mayor parte alcohólico, n'habiendo tamién persones con toxicomaníes. Son persones que tienen una vida que tá desestructurada y con perpoques posibilidaes de recuperación. Sicasí, nel Albergue Cuadonga se trabaya con toos ellos, y a los que nun se recuperen, se-yos da agospiu. Otru programa ye SICAR, que dirixe la Congregación de les Adoratrices. la so representante, Dª Rosa Martín, conseñó que trabayen con prostitutes, que quieren dexar esti oficiu, p'algamar el so reinxertamientu social. Dixo que se-yos daba agospiu, asesoramientu psicolóxico y xurídico y que se-yos forma pa que puean tener una ocupación. N'atopando un trabayu, siguen nel centru hasta que son económicamente independientes. En pallabres de Martín, pasen per cuatro etapes d'integración, siendo la cabera nun pisu nomáu "d'autonomía". La congregación ye una familia pa estes muyeres, a les que se-yos sigue echando un gabitu en cuantes lu necesiten. Per otru llau, el presidente de l'Asociación Xixonesa de la Caridá, D. Pedro González, conseñó que la Cocina Económica sirve 250 desayunos, xintes y cenes y da agospiamientu pela nueche. Los usuarios son na so mayoría xóvenes drogadictos, a los que se-yos ufierta tamién participar nun taller ocupacional. En rellación col Proyeutu Home, el so presidente, D. Lluis Manuel Flórez, esplicó que'l conveniu robláu ye pa dar un finxu al inxertamientu sociu-llaboral de los toxicómanos, el trabayu coles sos families y l'ayuda nel procesu de recuperación. P'acabar, la Fundación Siloé, dirixida por D. Xosé Antoniu García Santaclara, trabaya con persones con discapacidá intelectual y enfermos con Inmunodeficiencia Alquirida. Tamién tien un centru de día pa les persones n'esclusión social y otru pa menores, de calter preventivu.