Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Publícase un llibru inéditu de Pepín de Pría

Votos

(Total de votos recibidos 529)

(Puntuación 3,00)

Pepin de Pria
La media cama («Comedia asturiana en dos actos, escrita en bable y en verso») ta acabante descubrise nun cuadernu manuscritu del autor.
L'acción desarróllase en Llanera, na víspera de San Mateo. Les referencies político-sociales que se lleen ente llinies remiten a los últimos años del sieglu XIX. La cama del títulu ye l'elementu al rodiu del que xira l'acción. El mecanismu dramáticu básase nun entemecíu de rellaciones personales y nun enriedu onde prima l'enquívocu con un telón de fondu costumista.

La noticia de Pilar Rubiera en La Nueva España

Conocíu nel mundu de les lletres asturianes col alcuñu de Pepín de Pría, nació José García Peláez en La Pesa, Pría, nel conceyu de Llanes en 1864. Estudia'l bachilleratu en Xixón y trabaya en diversos oficios. Comprometíu col republicanismu federal, collabora en dellos periódicos y contribúi a fundar otros. En 1896 emigra a Cuba y unvía dende ellí cróniques a la prensa asturiana sobre la situación que vive la islla neses dates.

Vueltu a Asturies, tres una curtia estancia nel so llugar natal, afíncase en Xixón. Na villa de Xovellanos intégrase bien lluego nel activu ambiente cultural que se vive alrodiu del Atenéu Obreru, les agrupaciones musicales obreres, el teatru y la prensa local. Exerce de profesor de primera y segunda enseñanza en Xixón y de maestru en Llavandera. Avezáu collaborador y redactor de diversos periódicos, el so nome como autor de versos y d'obres de teatru na nuestra llingua féxose ensiguida popular en toa Asturies.

En vida llegó Pepín de Pría a publicar les obres de teatru: ¡A L'Habana! (1895), ¡El diañu de los microbios! (1914) y el llibru de poesía Nel y Flor (1926), lleváu a imprenta gracies a una suscripción popular. Ye autor d'una riestra de pieces teatrales costumistes, delles bien populares tanto en vida del autor como depués de la so muerte: Alma virxen, Pinín l'afrancesáu, Venta quita renta, etc. Pepín de Pría vuelve nos sos últimos años al llugar de Pría, onde trabaya como llabrador. Fallez en 1928. Al morrer dexó inéditu un otru llibru de poesía: La Fonte del Cai, publicáu de manera incompleta en 1958 pol IDEA y en 1984 yá en versión íntegra y aviada por Miguel Ramos Corrada.

Anque Pepín de Pría fue en vida más conocíu como autor teatral que como autor de versos, la so obra poética sobrepasa abondo en calidá al so teatru y fai del escritor llaniscu una de les figures claves de la lliteratura asturiana anterior al Surdimientu. Particular bebedor de les fontes del modernismu y del romanticismu, Pepín de Pría, ensaya un tipu de poesía onde la eufonía y la bayura lésica busquen formes cultes pa la poesía n'asturianu. Los sos dos poemarios: Nel y Flor y La fonte del cai, embaxo la so apariencia de simples idilios bucólicos, paecen guardar l'intentu del poeta de Pría por construir un mundu míticu que remita al pasáu más llonxanu d'Asturies.